رواية زين بقلم سحر فرج (كاملة)1

الله قومت بالباقى ده انت كداب اوى .
عمر بيضحك اوى من طريقه كلام ليل وقال .. ده انتى طلعتى مش سهله ابدا اهو وانا اللى بقول عليكى عبيطه وهبله ومش بتخدى بالك من اى حاجه .. ماشى ماشى يا ستى انا فعلا اللى اكلتهم .. تعالى بقى نقعد كده وناكل البيتزا السخنه دى اللى جيبهالك .. انا عارف انك زمانك مليتى وزهقتى من اكل العيانين اللى فى المستشفى ده .. وعدى الجمايل بقى يا ست ليل وخليكى فاكرة 
ليل لا يا سيدى علشان بعد كده تزلنى و تقول انى أكلت البيتزا كلها هى كمان لوحدى ولا ايه 
عمر بضحك رد وقال .. لا تعالى يا ستى مټخافيش مش هاقول حاجه و.......
وفجاه سمعوا خبط على الباب وليل بصت لعمر باستغراب وقام عمر علشان يشوف مين وفتح على طول واتفاجاه بزين اخوه شايل بوكيه ورد وجاى يطمن على ليل .
عمر بابتسامه عريضه واستغراب لانها حاجه غير متوقعه من زين بصله وقال .. اهلا استاذ زين .. جيت يعنى مع انك كنت مشغول جدا فى الشغل ولا زوغت وسيبتهم وجيت !!
زين ابتسم وبص لي ليل وقال .. مساء الخير .. ممكن ادخل الاول يا استاذ انت وبعدين نتكلم 
ليل بخجل ردت وقالت .. اه طبعا اتفضل يا استاذ زين .
ودخل زين وقرب منها وقدملها بوكيه الورد وابتسم وقال .. انا اسف انى مجتش سألت عليكى بقالى يومين .. اعذرينى لانى كنت مشغول جدا فى الشركه .. وكنت بطمن عليكى من عمر اخويا ومن الدكتور حسام اول بأول .
ليل بخجل ردت وقالت.. متقولش كده يا استاذ زين وكفايه اوى اللى عملتوه معايا لحد دلوقتى تعبتكم كلكم معايا .. وكفايه اللى دكتور حسام بيعمله معايا .. انا مش عارفه هاقدر اوفى جميلكم ده ازاى .
عمر برق لها جامد وبصلها وقال .. وانا ابن البطه السودا مش كده ولا ايه مجبتيش سيرتى خالص ليه يا هانم .. يخونك الشيكولاته والبيتزا يا ليل .. ويخونك الهزار والضحك اللى ضحكتهولك خلال اليومين اللى فاتوا دول .. وعمل نفسه زعلان .
زين بعصبيه اول لما سمع كلام عمر اخوه بصله و قال .. ما تلم نفسك يا بنى ادم انت .. شيكولاته ايه وبيتزا ايه اللى بتتكلم عليها دى عيب الكلام ده يا قفل انت .
ليل ڠصب عنها ضحكت اوى من قلبها لاول مره من فترة طويله وبصتله بأسف وقالت .. سيبه سيبه يا استاذ زين انا عارفه ان عمر ما يقصدش حاجه من اللى انت فهمته ده .. وفعلا من غيره مكنتش عارفه هاعمل ايه ده هون عليا كتير اليومين دول والصراحه كتر خيره مقصرش معايا ابدا .
وبعدين كتر خيركم انتم الاتنين ربنا يقدرنى وارد جميلكم ده عليا . 
زين رد وقال .. ولا جميل حاجه عيب متقوليش كده .. وقبل ما يكمل كلامه موبيله رن وكانت مامته اللى بتتصل .. فاستأذن وخرج بره الاوضه علشان يتكلم براحته 
زين مسك موبيله ورد وقال .. اهلا يا ست الكل .. وحشيتينى والله .. اخبارك ايه يا حبيبتى 
سميحه من اسكندريه ردت وقالت .. اهلا يا زين انت اللى وحشتنى يا حبيبى واخبار عمر ايه وداده زينب وميرفت 
زين بحب رد وقال .. الحمد لله يا امى كلنا بخير وكويسين المهم طمنينى عليكى انتى وعلى صحتك وعلى خالتو 
سميحه ابتسمت وقالت .. الحمد لله يا حبيبى انا كويسه جدا وخالتو كمان كويسه انت عارفنى لما بكون فى اسكندريه وبالتحديد فى القصر وجنب البحر بالذات نفسيتى وصحتى بتيجى عليهم .. انا اتصلت اطمن عليكم انتم وابلغك اننا هانرجع بكرة ان شاء الله .
زين باستغراب رد وقال .. تمام يا حبيبتى توصلى بالسلامه تحبى ابعت عمر ليكى امتى علشان يجيبك 
سميحه ردت وقالت .. لا يا حبيبى خلى عمر مستريح .. انا هارجع مع شاهندا وخالتك سماح علشان عاوزين يقضوا كام يوم معانا ويشتروا شويه حاجات للجمعيه بتاعه الايتام بتاعتهم .
زين اتنهد واتعصب وقال .. ده لسه كانوا عندنا الاسبوع اللى فات ملحقوش يوحشونا يعنى يا امى . 
هما مش بيتعبوا من كتر السفر ده رايح جاى يعنى !!
سميحه بزعل ردت وقالت .. جرى ايه يا زين .. عيب كده يا حبيبى ميصحش .. وبعدين دى اختى الوحيده وماليش غيرها فى الدنيا دى كلها هى وبنتها الوحيده وعمى صفوان .. اقولهم لا متجوش عندنا مش عاوزينكم ولا زين عاوزكم تيجوا عندنا يعنى يا ابنى ولا ايه مش كفايه بتزعل منك شاهندا دايما بسبب مقابلتك ليها وهى فى بيتك !! ودايما مكشر فى وشها ومش بتقعد ترحب بيها ولا بتتكلم معاها ابدا زى اخوك وزى ما القرايب بيعملوا مع بعض رغم انها بتحبك جدا انت وعمر .
زين